თბილისი (GBC) - აშშ-ის პრეზიდენტი დონალდ ტრამპი ირანს „სიკვდილით, ცეცხლითა და რისხვით“ დაემუქრა, თუ ის ჰორმუზის სრუტეს ჩაკეტავს. ტრამპმა განაცხადა, რომ ისლამური რესპუბლიკა „ოცჯერ უფრო ძლიერ“ დარტყმას მიიღებს, ვიდრე აქამდე, თუ ის მსოფლიოს ერთ-ერთ უმნიშვნელოვანეს სავაჭრო დერეფანში ნავთობის ნაკადს შეაჩერებს.
აღნიშნული მუქარა მას შემდეგ გაჟღერდა, რაც ორშაბათს ნავთობის ფასმა ბოლო ოთხი წლის განმავლობაში პირველად გადააჭარბა 100 დოლარს ბარელზე. The Wall Street Journal-ის ინფორმაციით, მრჩევლები ტრამპს პირად საუბრებში ომის დასრულების გზების ძიებისკენ მოუწოდებენ, რადგან არსებობს შიდა პოლიტიკური უკუკავშირის შიში საწვავზე ფასების მკვეთრი მატების გამო.
ტრამპის ადმინისტრაციის წარმომადგენლები აფრთხილებენ პრეზიდენტს, რომ რაც უფრო დიდხანს გააგრძელებს აშშ სამხედრო ოპერაციას ახლო აღმოსავლეთში, მით უფრო ნაკლებად სავარაუდოა კონფლიქტიდან იოლი გამოსვლა.
ორშაბათს ღამით, ვლადიმერ პუტინთან სატელეფონო საუბრის დასრულებისთანავე, ტრამპმა განაცხადა: „ვფიქრობ, ომი მეტწილად დასრულებულია“, რამაც საფონდო ბირჟების ზრდა და ნავთობის ფასის ვარდნა გამოიწვია. თუმცა, რამდენიმე საათში მან საკუთარ სოციალურ პლატფორმა Truth Social-ზე დაწერა:
„თუ ირანი გადადგამს რაიმე ნაბიჯს, რომელიც შეაჩერებს ნავთობის ნაკადს ჰორმუზის სრუტეში, ამერიკის შეერთებული შტატები მათ ოცჯერ უფრო ძლიერად დაარტყამს, ვიდრე აქამდე. გარდა ამისა, ჩვენ გავანადგურებთ ადვილად დასაზიანებელ სამიზნეებს, რაც ირანის, როგორც ერის, აღდგენას პრაქტიკულად შეუძლებელს გახდის. მათზე სიკვდილი, ცეცხლი და რისხვი იმეფებს - თუმცა, იმედი მაქვს და ვლოცულობ, რომ ეს არ მოხდება!“
საპასუხოდ ირანის „ისლამური რევოლუციის გუშაგთა კორპუსმა“ განაცხადა: „ომის დასასრულს ჩვენ განვსაზღვრავთ“.
