თბილისი (GBC) – ევროპის რეკონსტრუქციისა და განვითარების ბანკი (EBRD) თბილისისა და EBRD-ის მიერ მხარდაჭერილი მწვანე ქალაქების პროგრამის ქალაქებისთვის, საქართველოს მთავრობას 16 მლნ ევროს სუვერენულ სესხს აძლევს. სესხი საშუალებას მისცემს საქართველოს დედაქალაქს განაგრძოს მყარი ნარჩენების მართვისა და ინფრასტრუქტურის მოდერნიზაცია, რის შედეგადაც მყარი ნარჩენებიდან წარმოებული გაზი ელექტროენერგიად გარდაიქმნება.
სესხს დაემატება 4 მილიონი ევროს გრანტი აღმოსავლეთ ევროპის ენერგოეფექტურობისა და გარემოს დაცვის პარტნიორობის (E5P) ფონდიდან. E5P ფონდის დონორები არიან ჩეხეთი, დანია, ესტონეთი, ფინეთი, საქართველო, გერმანია, ლიეტუვა, ნორვეგია, პოლონეთი, შვედეთი, TaiwanBusiness-EBRD ტექნიკური თანამშრომლობის ფონდი, ამერიკის შეერთებული შტატები და ევროკავშირი, როგორც ყველაზე დიდი დონორი.
დაფინანსების წყალობით, ქალაქ თბილისს შეეძლება განაახლოს დიდი ლილოს ნაგავსაყრელზე არსებული უჯრედები და დაამონტაჟოს ნაგავსაყრელის გაზების შეგროვების, დამწვრობის და უტილიზაციის (ნაგავსაყრელი გაზის ენერგიად გადაქცევის) სისტემა. მოსალოდნელია, რომ ნაგავსაყრელის გაზიდან განახლებადი ენერგიის წარმოება წელიწადში 30 000 მგვტ/სთ-ს მიაღწევს.
ამ დაფინანსებით თბილისი EBRD-ის მწვანე ქალაქების პროგრამის ფარგლებში დღემდე ყველაზე მეტი ინვესტიციის მქონე ქალაქი ხდება.
EBRD-ის განცხადებით, გაზიდან ენერგიაზე გადაყვანის ობიექტის განხორციელება გააუმჯობესებს მყარი ნარჩენების მომსახურებას ქალაქის 1.5 მლნ მოქალაქისთვის და შეამცირებს სათბურის გაზების გამოყოფას 75%-ით, რაც ხელს შეუწყობს კლიმატის ცვლილების შერბილებას.
დაფინანსება ხორციელდება პროექტის განხორციელების ტექნიკური მხარდაჭერით, ხოლო პროექტის მომზადებას შვედეთი აფინანსებს.
ევრობანკი თბილისთან 2018 წლიდან ბანკი თანამშრომლობს, რათა გააუმჯობესოს მყარი ნარჩენების მართვის სისტემა კრიტიკული ინვესტიციების დაფინანსებით მყარი ნარჩენების შეგროვების მოძველებულ დანადგარებსა და მანქანებში, ნაგვის სატვირთო მანქანების ავზის მართვის სისტემების ოპტიმიზაციის, გადამტანი სადგურების განახლებისა და ჩამდინარე წყლების შეგროვება და დამუშავების სისტემების მშენებლობის და ქალაქში ნარჩენების დამუშავების პირველი ობიექტების მშენებლობის მიმართულებით.
ინვესტიციის ფარგლებში, ქალაქის ნარჩენების მართვის კომპანია დანერგავს პერსონალის ტრენინგ პროგრამას გენდერული ძალადობისა და შევიწროების რისკების პრევენციისა და შერბილების შესახებ.
სასესხო და საგრანტო ხელშეკრულებებს ხელი მოეწერა ერევანში, სომხეთში EBRD-ის ყოველწლიური შეხვედრისა და ბიზნეს ფორუმის დროს.
დღეისათვის EBRD-მა 5 მლრდ ევროზე მეტი ინვესტიცია განახორციელა საქართველოს ფინანსურ, კორპორაციულ, ინფრასტრუქტურულ და ენერგეტიკულ სექტორში 293 პროექტში, რომელთა ინვესტიციების 82% კერძო სექტორშია.
