თბილისი (GBC) - პრეზიდენტმა ვოლოდიმირ ზელენსკიმ განაცხადა, რომ შეხვდა უკრაინელ სამხედრო ექსპერტებს, რომლებიც უკვე ერთ კვირაზე მეტია საუდის არაბეთში იმყოფებიან. შეხვედრაზე განიხილეს მუშაობის შედეგები და ცის დაცვის შემდგომი გაძლიერების საკითხები.
„შევხვდი ჩვენს სამხედრო ექსპერტებს, რომლებიც უკვე ერთ კვირაზე მეტია საუდის არაბეთში იმყოფებიან. ბიჭებმა მომახსენეს გუნდის მუშაობის პირველი შედეგები და დასკვნები როგორც ოპერაციულ, ისე უფრო ფართო დონეზე. ამ რეგიონში ჩვენი ექსპერტების ძირითადი ამოცანაა პრობლემური საკითხების გამოვლენა და იმ ცვლილებების განსაზღვრა, რომლებიც საჭიროა ადამიანებისა და სიცოცხლის დასაცავად ირანული „შაჰედებისა“ და რაკეტებისგან. მადლობელი ვარ მათი ოპერატიული და საფუძვლიანი მუშაობისთვის. არის კონკრეტული რამ, რაც შეგვიძლია ჩვენს პარტნიორებთან ერთად გავაკეთოთ“, - განაცხადა ზელენსკიმ.
პრეზიდენტის თქმით, უკრაინელმა ექსპერტებმა მოკლე დროში მოასწრეს გამოცდილების გაზიარება და იმის ჩვენება, თუ როგორ იცავენ უკრაინაში ადამიანებსა და ინფრასტრუქტურას. ზელენსკიმ ხაზგასმით აღნიშნა, რომ უკრაინული ექსპერტიზა საჰაერო თავდაცვის სფეროში უნიკალურია, რადგან ის რეალურ საბრძოლო პირობებში ჩამოყალიბდა და უკვე დაამტკიცა საკუთარი ეფექტურობა.
მან ასევე დასძინა, რომ უკრაინა მზად არის დაეხმაროს იმ სახელმწიფოების დაცვაში, რომლებიც მხარს უჭერენ მას დამოუკიდებლობისთვის ომში. შეხვედრაზე განიხილეს საუდის არაბეთში ცის თავდაცვის გასაძლიერებლად საჭირო საკვანძო საკითხები, პირველ რიგში, დრონების ჩამოგდების მიდგომები. ზელენსკიმ აღნიშნა, რომ უკრაინა მზად არის გრძელვადიანი და ურთიერთხელსაყრელი თანამშრომლობისთვის.
26 მარტს უკრაინის პრეზიდენტი ვოლოდიმირ ზელენსკი ვიზიტით საუდის არაბეთში ჩავიდა. მანამდე ცნობილი გახდა, რომ უკრაინელი ექსპერტები უსაფრთხოებისა და უპილოტო საფრენი აპარატების წინააღმდეგ ბრძოლის საკითხებში იმყოფებოდნენ კატარში, არაბთა გაერთიანებულ საამიროებსა და საუდის არაბეთში.
