თბილისი (GBC) - ვენესუელაში მომხდარი მძლავრი მიწისძვრის შედეგად დაღუპულთა ოფიციალური რაოდენობა 1 450-მდე გაიზარდა, თუმცა რეალური ციფრი, სავარაუდოდ, გაცილებით მაღალია. ამის შესახებ Reuters წერს.
სტიქიამ, რომლის მაგნიტუდამ 7.2 და 7.5 შეადგინა, ქვეყანა უმძიმესი ჰუმანიტარული და ეკონომიკური კრიზისის წინაშე დააყენა. აშშ-ის გეოლოგიური სამსახურის (USGS) წინასწარი პროგნოზით, მსხვერპლის რაოდენობამ შესაძლოა 10,000-ს გადააჭარბოს, რაც ამ კატასტროფას ლათინურ ამერიკაში გასული საუკუნის განმავლობაში ერთ-ერთ ყველაზე მასშტაბურად აქცევს.
მიწისძვრის ეპიცენტრი კარაკასიდან ჩრდილოეთით, დაახლოებით 40 კილომეტრში მდებარე სანაპირო შტატ ლა-გუაირაში დაფიქსირდა, რომელიც ქვეყანაში ყველაზე მეტად დაზარალდა.
ბოლო მონაცემებით, სრულად დაინგრა 774 შენობა, იძულებით გადაადგილებულ პირთა რაოდენობამ 12 721-ს მიაღწია, ხოლო დაშავებულია სულ მცირე 3 150 ადამიანი.
ქვეყნის დროებითი პრეზიდენტის, დელსი როდრიგესის განცხადებით, რეგიონში ელექტრომომარაგების აღდგენა მხოლოდ 75%-ით მოხერხდა. პარალელურად, საავტომობილო გზების ჩაკეტვის გამო, ხელისუფლებამ ლა-გუაირას მიმართულებით გადაადგილება შეზღუდა, რათა სპეცტექნიკასა და სასწრაფო დახმარების მანქანებს მუშაობის შესაძლებლობა მიეცეთ. ქვეყნის მასშტაბით სასწავლო პროცესი კიდევ ერთი კვირით არის შეჩერებული.
სტიქიამ პირდაპირი დარტყმა მიაყენა ვენესუელის ეკონომიკის მთავარ მამოძრავებელ სექტორს. დასავლეთ ფალკონის შტატში ელექტროენერგიის მასშტაბური გათიშვის გამო, მუშაობა სრულად შეაჩერა ქვეყნის უმსხვილესმა ნავთობგადამმუშავებელმა ქარხანამ - „ამუაიმ“ (Amuay), რომელიც დღეში 645 000 ბარელ ნავთობს აწარმოებს.
Reuters წერს, რომ ქარხნის გაჩერება კიდევ უფრო გაამწვავებს ქვეყანაში არსებულ ღრმა ეკონომიკურ კრიზისს.
მიწისძვრის ზონაში უკვე მუშაობს 2 600-ზე მეტი უცხოელი მაშველი, მათ შორის აშშ-ის, მექსიკის, კოლუმბიისა და შვეიცარიის გუნდები. ვაშინგტონიდან მიღებული ინფორმაციით, აშშ-ის ადმინისტრაცია უახლოეს დღეებში რამდენიმე ასეული მილიონი დოლარის ღირებულების ფინანსური დახმარების პაკეტს გამოაცხადებს. ეს თანხა დაემატება იმ $150 მლნ-ს, რომელიც ტრამპის ადმინისტრაციამ მანამდე გამოყო.
ამასთანავე, ოპოზიციის მიერ მხარდაჭერილ ვებგვერდზე დაკარგულად რეგისტრირებულთა რაოდენობა თითქმის 50 000-ს აღწევს.
ქვეყნის მასშტაბით კრიტიკული მდგომარეობაა პროზექტურებსა და სამედიცინო დაწესებულებებში. ლა-გუაირაში ოფიციალური პირები დღეში დაახლოებით 750 ცხედარს ამუშავებენ, რის გამოც კარაკასიდან ყოველდღიურად 50-მდე სასამართლო ექსპერტი მიემგზავრება მათ დასახმარებლად. თავად კარაკასის მორგში დღეში 40-დან 80-მდე ცხედარი შედის.
კვირის მონაცემებით, 150 ნეშტი გაუცემელია, საიდანაც 130-ის იდენტიფიცირება ამ დრომდე ვერ ხერხდება. ხელისუფლება დაზარალებულ ოჯახებს უფასო კრემაციას სთავაზობს და არ გამორიცხავს საძმო საფლავების გამოყენებას, რასაც ვენესუელის ინფექციურ დაავადებათა საზოგადოება ეწინააღმდეგება, რადგან ეს არღვევს იდენტიფიკაციის საერთაშორისო პროტოკოლებს და საფრთხეს უქმნის საზოგადოებრივ ჯანდაცვას.
კატასტროფა ვენესუელაში მიმდინარე მწვავე პოლიტიკური არასტაბილურობის ფონზე ხდება. ქვეყანას დელსი როდრიგესის მთავრობა მართავს მას შემდეგ, რაც მისი წინამორბედი იანვარში აშშ-ის რეიდის შედეგად ჩამოაგდეს.
ამავდროულად, ოპოზიციის ლიდერმა და ნობელის მშვიდობის პრემიის ლაურეატმა, მარია კორინა მაჩადომ განაცხადა, რომ სამშობლოში ბრუნდება, სადაც 2024 წლის საპრეზიდენტო არჩევნების შემდეგ მალულად ცხოვრობდა, ვიდრე დეკემბერში ქვეყანას პრიზის მისაღებად დატოვებდა. მისი დაბრუნების გეგმა ვაშინგტონში შეშფოთებას იწვევს, რადგან თეთრი სახლის შეფასებით, კრიზისულ პერიოდში ეს ნაბიჯი ნაადრევია.
